持明法施 仁增塔欽

⚜️持明 仁增塔欽仁波切2022.05.14  ⚜️持明 仁增塔欽⚜️   ⚜️བརྒྱ་སྦྱིན་གཞུ་མདངས་རླུང་རྟ་སྒེག་མོའི་ཁྱུར།། སྤྲིན་གྱི་མེ་ཏོག་མངོན་འདོད་གྱིས་བྲེལ་བར།། བརླན་སྐྱེས་རྩེ་མོ་ཅན་དག་སྨུག་གསེབ་ནས།།ཁ་ཁི་སིམ་པོས་ཕག་བལྟ་བྱེད་ལ་ལྟོས།། བྲེ་ཤ་ཐོན་པའི་འཁོར་བའི་ཕུན་ཚོགས་དཔལ།། དགེ་མཚན་བྱེ་བས་སྤུད་པའི་མཐོང་བ་འདིས།། ནང་དུ་ཡང་དག་འཇོག་ལ་རིང་བ་ང་།། ངེས་འབྱུང་བློ་རབ་སྐྱེ་བར་བླ་མ་མཁྱེན།། ཡིད་འཕྲོག་འོད་སྐུ་རྗེས་ཆགས་ཟླ་བའི་བཞིན།། སྣང་གསལ་འཇའ་རས་ལྭ་བས་གཡོག་པ་ཡི།། བདེ་ཆེན་ཀུན་བཟང་ཡེ་ཤེས་མཚོ་རྒྱལ་ལྷའི།། བྱིན་གནས་ཉམས་དགའ་དབེན་པའི་ལྗོངས་འདི་ནས།། བོད་ཆོས་ཐུབ་བསྟན་གྲུབ་རྟགས་སེམས་འདུལ་ཏེ།། ཉོན་མོངས་མགོ་ནས་མནན་པའི་རྫུ་འཕྲུལ་གྱིས།། བགས་ཆགས་ཞེ་སྡང་དགྲ་བོའི་འགྱུ་རྟོག་ཀུན།།  བསྒོམས་མྱོང་གཉེན་པོའི་ཕྱོགས་ཀྱིས་གྲོལ་ནུས་ཤོག། རྒྱ་ཀོང་རིག་འཛིན་མཐར་ཕྱིན།

持明 仁增塔欽仁波切2022.04.12  ⚜️持明 仁增塔欽⚜️   ཉོན་མོངས་ཟད་པས་སྲིད་པར་མི་སྐྱེ་པའི།། ཟག་མེད་འགོག་པར་བརྒྱལ་བའི་ཉན་རང་རྣམས།། དག་ཞིང་པདྨའི་སྦུབས་སུ་སྐྱེས་པའི་ཚེ།། རྒྱལ་བའི་འོད་ཀྱིས་བསྐུལ་བཞིན་ཐེག་ཆེན་གྱི།། བྱང་ཆུབ་སེམས་བསྐྱེད་ལམ་བསྒོམས་སངས་རྒྱས་ཐོབ།། རིང་ལུགས་དེ་དང་དེ་ལས་འཐུས་ཚང་པའི།། བྷོད་བརྒྱུད་ཐུབ་བསྟན་ཐེག་ཆེན་ཟབ་མདོའི་གཞུང་།། གསང་ཆེན་ཐབས་མཁས་རྡོ་རྗེ་སྙིང་པོའི་ལུགས།། རྩེ་རྒྱལ་འོད་གསལ་རྫོགས་པ་ཆེན་པོའི་སྡེ།།ལྟ་བ་བླ་མེད་བསྒོམས་གྱིས་འཛིན་པ་ཡི།།སྔ་འགྱུར་རིག་འཛིན་བརྒྱུད་པ་བཅས་པ་ལ།།དད་དམ་སྙིང་ལ་སད་པས་སྐྱབས་སུ་འཆི།། ཉམས་དང་རྟོགས་པ་འཆར་བར་བྱིན་གྱིས་རློབས།། སྡང་དུག་འཕྱུར་སླ་རྒྱ་ཀོང་རིག་འཛིན་མཐར་ཕྱིན།

持明 仁增塔欽仁波切2021-12-19 💎持明 仁增塔欽💎 དེ་སྔོན་ཆོས་གྲྭར་དེ་ཚོར་ཡོད་སྐབས་འཛིན་གྲྭ་བརྒྱུད་དུས་འདི་འདྲ་བྲིས་ཡོད་ན་ཁྱེད་རང་གི་མི་ཚེའི་རྗེས་དྲན་དང་་་་གཞན་སྣང་འདྲེན་པ་ལ་ཕན་ཀྱང་ཁྱེད་ལ་དེ་འདྲའི་རིགས་ཀྱི་རྩོམ་ཡོད་མེད་ངས་མི་གསལ་་་གལ་ཏེ་ཡོད་ན་དེ་དུས་ལོ་ཆུང་སྐབས་སུ་བྲིས་པ་དང་། ཆེ་དུས་བྲིས་པ་གཉིས་རིན་ཐང་མི་འདྲ་་་་་ལོ་ཆུང་ལ་ཕར་འགྲོ་བ་ནི་ཆུ་བོ་གྱེན་བཟློག་ལས་དཀའ། དེའི་ཕྱིར་དེང་རྩོམ་བྱིས་པའི་བསམ་བློའི་འདུ་འགོད་དང་། རྒྱ་རྩོམ་འཚོ་བའི་གསོན་ཤུགས། བོད་གནའ་རྩོམ་་ཚིག་དོན་བརྗིད་པ་སོགས་བྲིས་ན་རྩོམ་སྲོལ་གང་བྲིས་ཀྱང་ཆོག་པ་རེད་དེ། གཞུང་རྩོམ་དཔྱད་པ་ཕེར་བ་དཀའ་གནད་མཐའ་དཔྱད་བཅས་པ་དང་། སྙན་ངག་ཡིན་ན་གནའ་དེང་སྙན་ངག་གི་རིན་ཐང་དོད་ཡོད་པའི་སྙན་ངག་འབྲི་བ་གལ། རྒྱ་ཡིག་གི་རྩོམ་ཡག་པོ་འདུག་ཀྱང་ངས་བལྟས་ན་གཞུང་ཆེན་ཁག་དང་འགྲེལ་བའི་དཔྱད་རྩོམ་བྲིས་ན་ད་ལྟའི་སློབ་སྦྱོང་ལ་ཕན། མ་འོངས་ཆོས་ལམ་ལའང་ངོ་མཚར་མི་ཆེའམ།

👑吾之上師在出家戒的新年祝福 ⚜️持明 仁增塔欽仁波切 2021.12.19  💎持明 仁增塔欽💎 དེ་ནས་བཅོམ་ལྡན་འདས་ཀྱིས་སྐུ་དངོས་ཀྱི་གདུལ་བ་ཐ་མ་གཉིས་ཏེ་དྲི་ཟའི་རྒྱལ་པོ་རབ་དགའ་ལ་ཆོས་བཤད་པས་རྒྱུན་དུ་ཞུགས་པ་ཐོབ་བོ། །ཀུན་ཏུ་རྒྱུ་རབ་བཟང་ཞེས་བ་བ་ལོ་བརྒྱ་ཉི་ཤུ་ལོན་པ་དེ་ཚུར་ཤོག་གིས་བསྙེན་པར་རྫོགས་ནས་དགྲ་བཅོམ་ཐོབ་བོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་བསྩལ་བ། དགེ་སློང་དག་ངས་འདུལ་བ་རྒྱས་པར་བསྟན་ན། མདོར་བསྡུས་ཏེ་མ་བསྟན་པས། ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་ངས་བཤད་དོ། །དགེ་སློང་དག་ཁྱེད་ཀྱིས་ངས་སྔོན་གནང་བ་ཡང་མེད། བཀག་པ་ ཡང་མེད་པ་གང་ཡིན་པ་དེ། གལ་ཏེ་མི་རུང་བ་བསྟན་ཅིང་རུང་བ་དང་མི་མཐུན་ན། རུང་བ་མ་ཡིན་པའི་ཕྱིར་སྤྱད་པར་མི་བྱའོ།།གལ་ཏེ་རུང་པ་བསྟན་ཅིང་མི་རུང་བ་དང་མི་མཐུན་ཏེ་མི་རུང་བ་བསན་ཅིང་རུང་བ་དང་མི་མཐུན་ན།རུང་བ་ཡིན་པའི་ཕྱིར་སྤྱད་པར་བྱའོ།། འདི་ལ་འགྱོད་པར་མི་བྱའོ།།ཞེས་གསུངས་པའི་དམ་ཆོས་འདུལ་བའི་རྡོ་རྗེའི་གནས་འདིས་དེ་རིང་དགེ་ཚུལ་དགེ་སློང་གི་འདུལ་སྡོམ་ཁ་ཙམ་མིན་པའི་དག་ལྡན་མཁན་དམིགས་བསལ་བ་དང་། དགེ་སློང་ཕ་མ་གཉིས། དགེ་སློབ་མ། དགེ་ཚུལ་ཕ་མ་གཉིས། དགེ་བསྙེན་ཕ་མ་གཉིས། བསྙེན་གནས་དང་བཅས་པའི་སོ་ཐར་རིགས་བརྒྱད་པོའི་ཐུགས་དགེ་བ་ལ་འདུན་པའི་དགེ་འདུན་...

👑持明 仁增塔欽👑 ས་ལ་སྨག་གིས་ཁྱབ་པར་གློག་འདྲ་ཤར་བའི་དོ་ནུབ་མཚན་ལྗོངས་ལ་ཁར་ཁ་རས་ཀྱིས་གཡོག གྱོན་པ་ཅི་མང་གྱོན་ནས་ལམ་ལ་ཆས། རྐུབ་སྟེགས་ཞིག་མཐོང་དེ་ན་ཟིང་འཇགས་ཀྱི་རེ་བ་དང་ཉི་འོད་ལ་དགའ་བའི་རྒས་དར་བྱིས་གསུམ་ཞིག་ཡོད་འདུག དགའ་ཏེ་སེམས་འཕར་མིག་གིས་ལམ་ལ་མ་བལྟས་ནས་ལག་པ་བརྐྱང་ནས་ཁོང་གསུམ་དང་སྐད་ཆ་བཤད་སར་སོང་། དེའི་འགྲམ་ལ་སླེབས་དུས་གྲངས་བསིལ་བསིལ་གྱི་ལམ་འགྲམ་དེའི་རྐུབ་སྟེགས་དེ་ལས་གཞན་ཅི་ཡང་མ་མཐོང་པས་འདུས་བྱས་ཀྱི་ཁྱིམ་མི་མི་རྟག་པས་བཤིགས་སོང་བ་དེ་ཐོལ་གྱིས་ཤར་ནས་སྐྱོ་བྱུང་། རླུང་བསིལ་དང་། ནད་ངན། འབྱུང་འཁྲུགས་དང་ཁ་བྲལ་སོགས་སྡུག་བདེན་གྱི་ཚུལ་རེད་ཞེས་རང་གིས་རང་ལ་ཁེར་ལབ་བྱས་ནས་བླ་མ་མཁྱེན་ཞེས་ཡིད་ནས་ཤར་ཤར་ཤར། ⚜️持明 仁增塔欽⚜️ 2021年11月11日

འཕགས་པ་ལས་རྣམ་འབྱེད་ཀྱི་མདོ་ལས།  🌈持明 仁增塔欽🔗 དེ་བཞིན་གཤེགས་པ་ལ་མེ་ཏོག་དབུལ་བའི་ཕན་ཡོན་བཅུ་ཡོད་དེ།  བཅུ་གང་ཞེ་ན།  ༡ འཇིག་རྟེན་ན་མེ་ཏོག་ལྟ་བུར་འགྱུར་བ་དང་།  ༢ དེའི་སྣའི་དབང་པོ་ནམ་ཡང་ཉམས་པར་མི་འགྱུར་བ་དང་།  ༣ ལུས་ལ་དྲི་ང་བ་མེད་པར་འགྱུར་བ་དང་།  ༤ ལུས་ལ་དྲི་ཞི་པོ་འབྱུང་བར་འགྱུར་བ་དང་། ་  ༥ ཕྱོགས་དང་ཕྱོགས་མཚམས་རྣམས་སུ་དེའི་ཚུལ་ཁྲིམས་ཀྱི་དྲི་ངད་ལྡང་བར་འགྱུར་བ་དང་།  ༦ འཇིག་རྟེན་པ་རྣམས་འཁོར་ཞིང་འདུ་བར་འགྱུར་བ་དང་།  ༧ ཡིད་དུ་འོང་བའི་ཆོས་རྣམས་འཐོབ་པར་འགྱུར་བ་དང་།  ༨ ལོངས་སྤྱོད་ཆེ་བར་འགྱུར་བ་དང་།  ༩ མཐོ་རིས་སུ་སྐྱེ་བར་འགྱུར་བ་དང་།  ༡༠ མྱུར་དུ་ཡོངས་སུ་མྱ་ངན་ལས་འདའ་བ་སྟེ།  供花的功德 《佛為首迦長者說業報差別經》 花供養如來的十種功德： 1. 處於世間如花一般茂盛生長。 2. 身上無有臭味污穢。 3. 福德及戒行之者,遍滿一切方所。 4. 隨所受生的處所,得鼻根不壞,能清楚分辨各種香味。 5. 能於世間超特勝出,為眾人所歸仰。 6. 身常保持芳香清潔。 7. 樂於聽受正法,受持讀誦。 8. 具有廣大福報。 9. 命終之後生於天上。 10. 能疾速證得涅槃。

དངོས་གྲུབ་མཆོག་སྦྱིན་དམ་ཚིག་རྡོ་རྗེའི་སྲོག།  🌈持明 仁增塔欽🔗 ཉམས་པར་གྱུར་པ་བླ་མའི་སྤྱན་སྔར་བཤགས།། ཉམས་པ་གཉེན་པོས་དག་གཙང་མ་བྱས་པར།། ལྕགས་ལ་གཡའ་བཞིན་ཆགས་པར་བླ་མར་བཤགས།། དག་པ་རྡོ་རྗེ་ཕུང་པོའི་གྲོང་ཁྱེར་ལ།། ཐལ་མལ་རྟོག་པས་སྒྲིབ་པའང་བླ་མར་བཤགས།། ཉམས་༼ཆགས་རྟོག་སྒྲིབ། ༽ 持明 仁增塔欽 2021年8月31日

🌈持明 仁增塔欽🔗  ཡིད་འཕྲོག་བཞིན་བཟང་ཆུ་སྐྱེས་བཞད་པའི་ཞལ།།ཟུར་མིག་ཟེའུ་འབྲུའི་ཕུང་ཕུང་གཡོ་བ་ཡི།།འགུག་བྱེད་དབང་གི་གར་འཆམ་ལྡེམ་ལྡེམ་ལ།།དམར་ནག་ཁྲོལ་གྱི་མཚོ་མོར་དགའ་བཞིན་ཡེངས།།  བདུད་རྩིའི་མྱོས་བུམ་མཐོན་པོའི་ཁུར་གྱིས་ལྕི།།རབ་དགའི་མཆུ་སྒྲོའི་དབང་གི་མདངས་འཚེར་བའི།། མྱི་རྗེ་གེ་སར་དགྱེས་པའི་དགའ་སྟེར་མ།། སྨིན་ལེགས་ལྷ་མོའི་འཆམ་འདིའི་སྒྱུ་རྩལ་རྨད།། དྭངས་སེམས་དགའ་བ་འཁྱིལ་བའི་སྤྲོ་བ་ཡིས།།ལེགས་བྱས་རྣམ་ཐར་འཁྲབ་པའི་གཡང་འཁྱིལ་སྡེ།། ཕུན་ཚོགས་རྒྱན་གོས་སྟངས་སྟབས་དྲ་མ་ཡིས།། རྫོགས་སྡེ་སྐྱིད་པའི་ཕྲིན་ལས་སྤེལ་ལ་བསྟོད།། 持明 仁增塔欽 2021年8月21日

🌈持明 仁增塔欽🔗 ཤེས་བྱའི་མཐའ་རུ་རྩེན་པའི་རྣམ་དཔྱོད་དང་།། མང་ཐོས་རིག་པའི་གློག་ཞགས་འཁྱུགས་པས་ཀྱང་།། ལྟ་བའི་གད་རྒྱང་སྒྲོག་པའི་རི་སུལ་པའི།། རྟོགས་པའི་གདོད་ཤེར་སུ་ཡིས་ཟླ་བར་ནུས།།  སྣང་ཞེན་སྤྲོས་པའི་མཚན་མས་བཅིངས་བ་དང་།། ཡོད་ཚད་ཇུས་འོག་ཤོར་བའི་མོག་མོག་པས།། བརྟན་གཡོ་ཕྲ་རགས་རྟོགས་པའི་རྣལ་འབྱོར་གྱི།། རིམ་གཉིས་ཉམས་ཀྱི་ཏིང་འཛིན་ཟླ་དང་བྲལ།། བརྒྱུད་གསུམ་བྱིན་རླབས་འབུམ་ལྡན་ལྷའི་བླ་མ།། དུས་གསུམ་འབྲལ་མེད་སྙིང་གི་མེ་ལོང་ངོར།། སྐུ་གསུམ་འདུས་པའི་དཔལ་དུ་འཆར་བྱས་ན།།  གསང་གསུམ་ཡོན་ཏན་རྒྱ་མཚོའི་ཕྲིན་ལས་ཟིན།། 持明 仁增塔欽 2021年8月26日

  ནགས་ཀྱི་དྲི་བསུང་འཐུལ་བའི་ངད་པ་དང་།།  🌈持明 仁增塔欽🔗 ཡིད་འཕྲོག་སྒྲོ་གུར་འཇའ་མདངས་བཀྲ་བ་ཡིས།། སྙན་འཇེབས་རོལ་མོ་དཀྲོལ་བའི་དབེན་ས་ཆེ།། མ་ཆགས་འཕགས་པ་དགྱེས་པའི་གནས་འདི་བསྔགས།། བསྲི་བ་མེད་པའི་སྡུག་བདེན་རང་མཚན་པས།། མནར་བར་ངལ་གསོའི་དབེན་སྟེགས་ཉམས་དགའ་བ།། གཉུག་སེམས་ངང་གྲོལ་ཀློང་དུ་བཞུགས་པ་ཡི།། མཚོ་སྐྱེས་པདྨའི་བྱིན་བརྒྱུད་འཛིན་ཚོར་དད།། སྟོན་སྤྲིན་དཀར་པོ་ཨ་སྔོན་གནམ་ནས་འཕུར།། བདུད་རྩིའི་སྨན་ཆར་ལྗོན་རྩེར་རྩེན་ས་འདིར།། ཆོས་བརྒྱད་མེ་འོབས་ཡིད་བྱུང་མཚམས་པ་རྣམས།། བསམ་གཏན་སྐྱིལ་ཆུང་རྒྱ་ཆེའི་ཞིང་ཁམས་བཀོད།།  གངས་རྫའི་དབུ་འཕང་སྨུག་པའི་ཞིང་ལ་ཕྱིན།། འཁྲིལ་བག་ལྕུགས་ཕྲན་ལྗོངས་མཐར་ཚལ་དུ་དཀྲིགས།། ཡལ་འདབ་སྟུག་པའི་ཡིད་འོང་ནགས་མཐོངས་འདིར།། སྔོན་བྱོན་དཔའ་སྤྲུལ་མི་ཕམ་བཞུགས་པའི་གནས།། 持明仁增塔欽 2021年8月27日

མ་བཅོས་ལྷུན་གྲུབ་ནོར་རྒྱལ་རྫ་རིའི་ཞོལ།། 🌈持明 仁增塔欽🔗 ཁོ་ར་ཁོ་ཡུག་ལྗོན་ཤིང་ཡིད་དུ་འོང་།། དྲི་བཞོན་བསིལ་བོས་ཕུལ་བའི་ལྷན་སྐྱེས་ཚལ།། དྲི་འཛིན་ལམ་དུ་སིམ་པའི་དགའ་བ་སྟེར།། སྔོ་ལྗང་ཀུ་ཤ་གཞོན་ནུའི་དབུ་རྩེ་རུ།། བདུད་རྩིའི་ཟིལ་བ་འཕྲོ་བའི་ལང་ཚོ་ཡིས།། ཟླ་བའི་མདངས་ལ་འཁུ་བའི་ཀེ་ལ་ཤར།། མཛའ་བའི་དུང་བས་འགུགས་པའི་རྣམ་འགྱུར་གཡོ།། གངས་དཀར་མུ་ཁྱུད་མཛེས་པའི་ཟིལ་ཁྲོམ་རིའི།། གཡུ་མཚོ་དྭངས་མ་མེ་ཡི་སྒྲུབ་གནས་སུ།། མ་སྨད་བསགས་སྦྱངས་ཡོན་ཏན་བྱེ་བ་ཡིས།། ཆོས་སྐུའི་རིག་གསང་བརྙེས་པའི་གྲུབ་ཆེན་མོད།། དགའ་མའི་གཟུགས་ལ་སོ་དྲུག་རྫས་ངན་སྒོམ།། གཡོ་མེད་བསམ་གཏན་ངེས་འབྱུང་སེམས་ཀྱིས་བསྐུལ།། འདི་སྣང་ཆུ་སྦུར་མཐོང་བའི་རྣལ་འབྱོར་བ།། བརྗིད་ཆགས་རི་འགུལ་འདི་ན་གནའ་ནས་མོད།། མཐོན་མཐིང་ནོར་བུའི་མདངས་འཚེར་གནམ་སྔོན་པོར།། མཚན་ལྗོངས་ཟླ་ཤེལ་རྒྱུ་སྐར་མོད་པོས་བསྐོར།། ཉིན་མོར་སྣང་བྱེད་འོད་ཟེར་བརྒྱ་བ་དང་།། སྤྲིན་དཀར་བླ་བྲེའི་བརྗིད་པ་ཡུན་གནས་ཤོག། 持明 仁增塔欽 2021年8月28日